Атлантыда 2007

У сьнежні 2007 года настальгічных фанатаў UltraВожыка чакае сюрпрыз. Выходзіць у сьвет дагэтуль невыдадзены відэёкліп на легендарную вожыкаўскую баляду "Атлантыда" (а не Атлянтыда, як амаль усе прызвычыліся пісаць), а з ім таксама новая, трохі перапрацаваная вэрсія песьні. Новую вэрсію, дарэчы, ужо можна спампаваць у раздзеле Музыка. А пакуль, для самых зацікаўленых, прапануем некалькі скрыншотаў з відэёкліпу. Вялікі дзякуй рэжысэру, прадусару, акторам ды той, хто першай зрабіла гэтую ініцыятыву.

Навіны ад сабачкі Ібрагіма Для вас дзьве навіны: адна добрая, а другая яшчэ лепей.

• Крыніца цяпла UltraВожыка ўжо трэці тыдзень удзельнічае ў гіт-парадзе Тузін гітоў.
• Тыя з вас, хто чакае выхаду Крыніцы цяпла на Песьнях свабоды 3, ніколі не дачакаюцца. Стваральнікі складанкі вырашылі выдаліць песьню са складу дыску з нагоды яе "нефарматнасьці". Трэк, судзячы па зьместу дыску, быў заменены на чарговы "фарматны" твор добрага сьпевака Чырвоным па белым (іх цяпер там тры).

Нарэшце... Новая песьня ад UltraВожыка

Тым хто ўжо здаўна чакае навінак ад UltraВожыка, дагэтуль прыходзілася няпроста. Але чакалі вы недарэмна. Калі ласка, мы прэзентуем новы твор "Крыніца цяпла". Для вялікіх аматараў ёсьць таксама новыя шпалеры на працоўны стол. Enjoy!

"Фабрыка сноў" на складанцы "Прэм'ер Тузін 2006"

"Фабрыка сноў" выйшла на новай складанцы музычнага гіт-параду Тузін Гітоў "Прэм'ер Тузін 2006", на якім зьмешчаныя 12 лепшых па выніках гіт-параду песьняў мінулага году, а таксама бонус з 30 мр3-файлаў. Разам з "Фабрыкай сноў" на дыске гэткія беларускія гіты як "Сьвятло ў цемры" (IQ48), "Аўтабіяграфія" (Ігар Варашкевіч і Лявон Вольскі), "Зь вераю" (Айша), а таксама песьні ў мр3 ад Tav.Mauzer, N.R.M., Indiga ды іньшых. Складанку ўжо можна набыць у крамах.

UltraВожык на myspace.com

Шаноўнае спадарства! UltraВожык адчыняе сваю старонку на партале myspace.com. Сабачка Ібрагім, вядомы энтузіяст усіх формаў тэхнічнага прагрэсу, асабліва рады: "Цяпер мы можам абшчацца з больш шырокай масай насяленія". Мы сардэчна віншуем ўсіх з гэтай нагоды і запрашаем зазірнуць да нас! (Для цікаўных: Сабачка вельмі ганарыцца сваім новым, па яго словах, "абалдзенна шыкоўным і к таму жа модным", акцэнтам, які ён выпрацаваў гледзячы БТ.)

Дзе падзеўся UltraВожык?

Глыбока засмучаны неадназначным рэзанансам "Супер-пупер Панарамы", Сабачка Ібрагім звяў у КНР вывучаць мясцовую мадэль камунізму. Голы Пётр Адамавіч катэгарычна адмаўляецца ісьці ў студыю, нягледзячы на прапановы Яўгена Шафы-Уругвайскага. Падрабязнасьці на нашым форуме.

Новы трэк ад DJ Mikoz

DJ Mikoz даслаў да UltraВожыка свой новы трэк "Здаровы...". Аб кім размова - не зразумела, але гучыць вельмі займальна. Да таго ж, твор выкарыстоўвае мелёдыю дзяржаўнага гімну, як і клясічная UltraВожыкаўская кампазыцыя "Вусаты дэмакрат".

"Фабрыка сноў" - песьня года №3 на Тузіне Гітоў

У выніковым гіт-парадзе Тузін Гітоў, дзе абіралася песьня года 2006, "Фабрыка сноў" атрымала трэцяе месца, пасьля "Аўтабіяграфіі" Ігара Варашкевіча ды Лявона Вольскага ды "Сьвятла ў цемры" IQ48. Хутка песьня павінна будзе з'явіцца на новай складанцы "Прэм'ер Тузін 2006.

"Фабрыка сноў" на Песьнях Свабоды 2

"Фабрыка сноў" выйшла на новай складанцы музычна-грамадзянскага праекту Песьні Свабоды. Разам з UltraВожыкам на дыске можна знайсьці песьні гэткіх вядомых беларускіх выканаўцаў як Лявон Вольскі, Крама, Новае Неба, ULIS ды іншых. Набыць складанку можна на сайце za-svabodu.org.