ultraвожык: біяграфія

Пётр Адамавіч	Сабачка Ібрагім	Яўген Шафа-Уругвайскі

2001: Нараджэньне UltraВожыка

UltraВожык утварыўся ў 2001 годзе па ініцыятыве сабачкі Ібрагіма, пад кіраўніцтвам якога і былі зробленыя першыя песьні – “Лыжы” ды “Вусаты дэмакрат”.

Нават самыя першыя запісы праходзілі не без прыгодаў. Так, падчас працы над “Вусатым дэмакратам” у студыю нечакана прыехала бабуля Пятра Адамавіча і хацела забраць нас з сабой у вёску, бульбу капаць. Ад нечаканасьці сабачка Ібрагім нават не пасьпеў выключыць мікрафоны, і размова была запісаная, а ўжо на наступны дзень песьню з удзелам бабулі Пятра Адамавіча можна было знайсьці на інтэрнэце.

А калі запісвалі “Лыжы”, у групе пачаўся канфлікт паміж вялікім прыхільнікам Лукашэнкі сабачкам Ібрагімам і крытыкамі ўлады Яўгенам і Пятром Адамавічам. Працаваць станавілася ўсё цяжэй. Гэта, натуральна, адбілася на гучаньні песьні. Мутнаватае гучаньне “Лыжаў” можна, напэўна, растлумачыць тым, што занепакоены канфліктам Пётр Адамавіч выпадкова падключыў гітару не да свайго улюбёнага ўзмацняльніка Marshall, а да звычайнай электрычнай разэткі. Пад уздзеяннем энергічнага рытму “Лыжаў” і, хутчэй за ўсё, не без уплыву 220 вольтаў з вышэй названай разэткі, Пётр Адамавіч так самааддана рыфаваў, што перавярнуў столік з малаком і прывезенымі бабуляй цукеркамі. Пасьля гэтага падзеі разьвіваліся імкліва. Раздражнёны маральным супрацьстаяньнем, сабачка Ібрагім падскочыў да Пятра Адамавіча і патрабаваў тлумачэньняў. Але Пётр Адамавіч так энергічна граў, што абсалютна выпадкова агрэў яго гітарным грыфам па галаве. Сабачка Ібрагім вельмі пакрыўдзіўся і разам пакінуў гурт. Запіс мы дараблялі ўжо без яго...

2003

Пасьля ўходу сабачкі Ібрагіма нам доўга не хапала ўнутранай моцы працягваць творчую дзейнасьць у рамках UltraВожыка. І толькі праз два гады, у самым канцы 2003 года, Вожык зноў нагадаў грамадзкасьці аб сваім існаваньні. З’явіліся дзьве новыя песьні – “Ідэалогія” і “Кагда я стану прэзідзентам”.

Натхнёныя ўвядзеньнем у навучальных установах Беларусі прадмету “Дзяржаўная ідэалёгія”, газавымі спрэчкамі з саюзнай Расеяй, а таксама карумпаванасьцю бабуляў, што прадаюць семкі, мы запісалі “Ідэалогію”. На ўсялякі выпадак, памятаючы дэструктыўныя паводзіны Пятра Адамавіча ў 2001 годзе, Шафа-Уругвайскі схаваў сілавы кабель ад Адамавіцкага ўзмацняльніка, і той быў вымушаны граць без электрычнага падключэньня. Так і зьявілася першая unplugged-песьня UltraВожыка “Кагда я стану прэзідзентам”.

У пачатку 2004 года новыя песьні былі выдадзеныя на CD разам з першымі дзьвюма, а таксама са спецыяльным бонус-трэкам з ліку самых раньніх запісаў для сапраўдных аматараў творчасьці UltraВожыка. Цікава, што ў нас саміх копіі дыска не засталося, такі быў попыт.

2005

Прыгоды UltraВожыка працягнуліся ў сакавіку 2005, калі нам прыйшлося па тэхнічных прычынах адмяніць запісы з іншым праектам. Злёгку занепакоеныя недастатковым уплывам UltraВожыка на стан беларускага грамадства, мы вырашылі выкарыстаць вымушаную паўзу і запісаць “Атлантыду”.

Для многіх “Атлантыда” зьявілася нечаканасьцю: рокава-баляднае гучаньне песьні і сур’ёзнасьць тэксту ня вельмі падыходзілі да склаўшагася іміджу UltraВожыка як хуліганаў, жулья ды правакатараў. Шмат казалася пра “новы саўнд” UltraВожыка. Насамрэч, “Атлантыда” проста прадэманстравала іншы бок UltraВожыка, новы варыянт гучаньня, якое было закладзена яшчэ ў папярэдніх песьнях.

Пётр Адамавіч з самага пачатку настойваў на мінімалізацыі кампазыцыі і наданьні ёй больш “натуральнага” гуку. Яўген, які быў заўсёды прыхільнікам складаных кампазыцый, дзе ўжыта шмат інструментаў ды эфектаў, спачатку ставіўся да гэтай ідэі скептычна. Але атрымалася надзвычай удала. “Атлантыда” стала адным з фаварытаў сэзону 2005 на “Тузіне гітоў” і прынесла нам шмат повых прыхільнікаў. Сёньня “Атлантыда” распаўсюджваецца на складанках “Прэм’ер Тузін 2005” і “Песьні свабоды 2006”, разам з песьнямі гуртоў Крама, N.R.M., Палац, Ulis, Zet, J_Морс і многіх іншых.

2006

Галоўнай нечаканасьцю 2005 года для Вожыкаў стала вяртаньне сабачкі Ібрагіма. Пераасэнсаваўшы паздеі папярэдніх гадоў і палітычны шлях беларускай дзяржавы, а таксама ўражаны посьпехам “Атлантыды”, сабачка вярнуўся напрыканцы сьнежня і мы вырашылі зноў нешта зрабіць разам.

“Фабрыка сноў” пабычыла сьвет 18 лютага 2006. Яўген, праглядзеўшы стужку “Матрыца” ды абслухаўшыся Kraftwerk адзначыў, што і адно і другоё вельмі нагадвае сучасную Беларусь. Апошняй кропляй натхненьня стаўся момант, калі сябры разам гледзячы БТ ды едзячы цукеркі заўважылі, што цукеркі гэтыя вырабляюцца на некай дзяржаўнай фабрыцы пад назвай “СНОВ”. “Дык яны не толькі Панараму робяць, але й цукеркі!” - заўважыў Яўген. “Гаў!” - адказаў сабачка Ібрагім. Гэтак і назвалі.

“Мы стараліся ўжыць старое гучаньне UltraВожыка ў новым, больш мелядычным фармаце, камбінуючы мяккую прыгажосьць міра сноў з жорсткім ды тэхнакратычным гукам фабрыкі”, - камэнтуе Пётр Адамавіч. “Гэтая песьня прысьвечаная ўсім тым, хто яшчэ не прачнуўся”, - падсумоўвае Яўген.

2007

Абураны дрэннымі паводзінамі расейцаў цягам так званага "газава-нафтавага канфлікту", сабачка Ібрагім пераканаў сваіх калег Яўгена ды Пятра Адамавіча аб'яднацца вакол Бацькі, ды адзіным фронтам даць адпор расейскай гадзіне.

***

Гісторыя UltraВожыка на гэтым не заканчваецца. Мы з вамі яшчэ пабачымся. А пакуль што памятайце: UltraВожык усіх і ўсё бачыць, і вас у тым ліку. Яго лепш не дражніць.